Bible

1 非利士人㧯以色列人在基利波山相㓾。當多以色列人被人㓾死；無死个人全部逃走。 2 非利士人逐到掃羅㧯佢該兜孻仔，㓾掉約拿單、亞比拿達㧯麥基‧舒亞。 3 四周圍向掃羅个攻擊緊來緊激烈；佢被敵人个箭射到，受重傷。 4 掃羅對代佢拿武器个侍衛講：「你个刀仔挷出來，將𠊎㓾掉！恁樣，該兜無受割禮个非利士人就無法度㓾到𠊎來凌辱𠊎。」總係該侍衛非常驚，毋敢㓾；所以掃羅挷出自家个刀仔來，伏在刀仔頂高將自家刺死。 5 該侍衛一看到掃羅死掉，也伏在自家个刀仔頂高自殺，㧯掃羅共下死。 6 這就係掃羅㧯三個孻仔，並該代佢拿武器个侍衛死个情形；在該日，掃羅个軍隊全部戰死。 7 耶斯列山壢該片㧯約旦河東片个以色列人看到以色列个軍隊全部逃走，又看到掃羅㧯佢該兜孻仔攏總戰死，就逃難離開佢等个城；非利士人就來佔領，住在該兜城。 8 第二日，非利士人去剝死人个戰衫；佢等發現掃羅㧯佢三個孻仔个屍體橫在基利波山， 9 就剁下掃羅个頭，剝掉佢个武器。佢等派人到非利士各地去，向佢等个偶像㧯人民報告這消息。 10 佢等將掃羅个武器放在亞斯她錄女神廟肚，將佢个屍體釘在伯‧珊个城牆頂。 11 基列地區雅比城个人民一聽到非利士人對掃羅所做个事， 12 佢等當中所有个勇士就出發，行歸夜，來到伯‧珊。佢等對城牆頂將掃羅㧯佢該兜孻仔个屍體拿下來，帶轉雅比，在該位燒掉。 13 佢等將骸骨葬在城肚个柳樹下，然後禁食七日。